مساكم ورد..شباب وبنوتات
جبتلكم قصيدتين من روائع
الشاعر محمد رحيمة الطائي
عجبوني وان شاء الله تعجبكم..
اجمل محطة..
اذا ماحبج انت..اشلون احب الناس ..؟؟
يا أول غـــرام بصغــــري .. وبكبــــري ..
وإذا ماشوفچ انتي اشلون اشوف الناس ؟؟
وآنه ابغير شوفچ بي قصر نظري !!
حبيتچ سهر .. وايامي غابة ليل ..
وبس وياچ اسهر يابعد عمري..
اذا مو ألچ اكتب .. ما احس بالشوگ ..
وآنه العله مودچ .. اكتــب ابشعري
جربتچ اهواي .. وشفتچ اوفى الناس ..
يا أول حبيبــة اتحمــــلت قهــــــري ..
أسأليني ... ابحياتي اشگد تمر نسوان ؟؟
ليش انتي الوحيدة .. الباقية ابفكري ..؟؟
وأسأليني .. ابحياتي اشبيها من اهموم
ليش آنه منشوفچ .. يطفه كل جمري ..؟؟
يا أجمل محطة .. البيها گلبي ارتاح
يانهر الحنان .. وبالگلـــب يجــري ...
تغفه أعيون ياما .. وياما ، نامت ناس
وآنه ويه الاشواگ .. وملتهي ابسهري
احسج من بعيدة .. ويختنگ صدري
ويمر طيفچ هوى .. واحتار اشمه امنين
وشكو احلى يعمري من الهوى العذري ؟؟
وتسأليني احبچ ....؟؟؟ اي نعم والله
بس ليش آنه احبچ ... ؟ صدگي ما ادري ..!!
جيران كلبي
لاموني اعله ضيمي .. المادروا بالضيم ..
واني لخاطرك .. ما انطي بسرارك ......
وحسدوني عليك ...واني كلي اجروح ..
ومتحمل لعينك .. وجـــع بســـمارك ....
لو بالخافي يدري اليعتب اعله الروح ..
چان ابعينه شاف ..ابگلبــي آثــــارك..
تحملتك جرح ..والون ، أون بسكوت ..
وفوگ الجرح هسه ..اتطالب ابثارك !!؟
هاك الروح بيدك .. وانت حر شتريد ..
سوي اللي تحسه .. ايطفي الك نارك
معذور اني اعذرك .. لأن گلبي وياك ..
خطوة .. بخطوة يمشي ويعرف اخبارك
خطار آنه روحي .. واجت يمك ضيف ..
ماظن شيمتــك تغــدر بخـــــطارك !! ..
تعرفني انت زين .. وأكثر من الناس ..
احط روحي سعف .. بس احمي جمارك
سوي اللي تريده .. اشضل بعد بالروح ؟
مو روحــي رهيــنه وباقيــة بـــدارك ..
تزعلني ، واحبك ، وانتشي بطرواك
وروحي اتذوب لهفه .. امنسمع اشعارك
يا كلشي انت عندي وكلشي انت وياي
عاين على جروحــي ويكفـــي اعذارك
مو تدري الوصية اتلوح .. سابع جار ...؟؟
يا جيران گلبي شبيك وي جارك ..؟؟